بعد ما زهقت من المذاكرة دورت فى النت لاقيت امتحان حلو ياريت تقروه معاى
السؤال الأول: التعبير
اكتب ما لا يقل عن 650 سطر في أحد الموضوعات التالية
[لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة
[شهدت بلدنا الحبيبة نهضة في مجال التشييد والبناء وخصوصا بعد وصول سعر الحديد إلى 8500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل في حديد عز
[بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
ــــــــــــــــــــــــــــــــــــــــــــــــــ ـــــــ
السؤال الثاني: القصة
من قصة ' وعهد الله ما أنت داخل الانتخابات' .. اقرأ القطعة وأجب عن الآتي
ثم أتى إليه وضربه بالجزمة وقال: أنت عايز تترشح في الانتخابات يا ؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟
[ما هي اللحمة؟ أو على الأقل حدد أقرب معنى خيالي لها
[مرادف معجزة في اللغة ( تغيير وزاري – زيادة المرتبات – رغيف العيش) اختر يا مقلول البخت
[ لماذا ضربه الرجل بالجزمة وليس بالعصي مثلا؟؟
أهو كسل .. لسة هيرفع العصاية؟ - عشان العصاية قلة قيمة برضه وإحنا في عصر الديمقراطية – عشان العصاية شغالة مع واحد تانى.. افهم أنت بقى اختر
[حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــ ــــــــــ
السؤال الثالث القراءة
من موضوع ( الزعيم..و الفنان.. والقدوة) اقرأ القطعة وأجب
وقد نفى الزعيم عادل إمام الإشاعات التي أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقي كما أنه يرحب بالتوريث ومقتنع بكل سياسات الحكومة
[ذكرنا في الدرس أن عادل إمام سيتقاضى في فيلمه القادم 12 مليون جنيه.. في رأيك ياعم المحروم تبقى البوسة بكام في الفيلم؟؟
[دخل كاتب هذه السطور مسرحية بودي جارد للزعيم رغم قرفه منه أساسا.. في رأيك ما السبب في دخوله؟
أكيد معزوم – طبيعي معزوم – وربنا معزوم.. اختر على أن تضع إيدك على المصحف وأنت بتحلف للمراقب بتاع اللجنة
ــــــــــــــــــــــــــــــــــــــــــــــــــ ــــــــــــ
السؤال الرابع النصوص
أجب عن أحد النصين الآتيين
من نص ( ماشربتش من نيلها)..اقرأ ثم أجب
(ماشربتش من نيلها.. جربت تغنى لها.. جربت في عز ما تحزن تمشى ف شوارعها وتشكى لها(
[بعد رغبة صاحبة النص في أن تلد ابنتها في أمريكا لتحصل على الجنسية الأمريكية..اختر..ما المقصود بنيلها في النص؟
( المسيسبي - الأمازون – يونج يانج(
[هذا النص من نصوص الحزب الوطني والدليل وجود اسم مهم من قيادات الحزب في النص.استخرج الاسم..وبوسه من بُقـُّه ورجَّعه مكانه
[أكمل الأبيات إلى آخر كحكة في الكليب
[قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى يا جارية .. كلف يا سيدي
من نص (حين ميسرة)..أجب عن الآتي
[اذكر اسم مصيبة واحدة محصلتش في النص الأسود ده
[وضح عبقرية أحمد بدير الإرهابي في النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابي بقى
[سبب وجود الشرطة كل خمس دقائق في النص
(موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص) اختر
ــــــــــــــــــــــــــــــــــــــــــــــــــ ـــــــــ
السؤال الخامس النحو
[أعرب ما تحته خط.. لو مالقيتش القطعة أصلا ..اتصرف
[ذهب الرئيس إلى المؤتمر .. ضع الجملة السابقة في صيغة المثنى.. ماعدا الرئيس طبعا يا كلب
[كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده
[ فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ
السؤال السادس ا لخط
[ كوز المحبة انخرم طرطش على كمي..يا حبيبي بطل جفا وارحم عذاب أمي
[اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط
هذا الامتحان نموذج من امتحانات شهادة العذاب (الثانويه العامه سابقا ) مع تحيات احد ضحايا الامتحانات
الزمن ربع ساعه وان كان عجبك
السبت نوفمبر 15, 2008 12:14 am
